திரிணமுல் காங்கிரசின் ஆணவம் தகர்க்கப்பட்டது: பிரதமர் மோடி

மேற்கு வங்கத்தில் முதல் கட்ட ஓட்டுப்பதிவில் திரிணமுல் காங்கிரசின் ஆணவம் தகர்க்கப்பட்டது என முதல்வர் மம்தா அரசை பிரதமர் மோடி கடுமையாக சாடியுள்ளார்.

மேற்கு வங்கத்தில் வடக்கு 24 பர்கானாஸ் மாவட்டத்தின் பன்கான் நகரில் தேர்தல் பிரசாரத்தில் பிரதமர் மோடி பேசியதாவது: மேற்கு வங்கத்தில் இரண்டாம் கட்டத் தேர்தல் பாஜவுக்கு ஒரு தீர்க்கமான வெற்றியை உறுதி செய்யும். மேற்கு வங்கத்தில் முதல் கட்ட ஓட்டுப்பதிவில் திரிணமுல் காங்கிரசின் ஆணவம் தகர்க்கப்பட்டது. மக்கள் கடுமையாக பாதிக்கப்பட்டுள்ளனர். நிலம் தவறாகப் பயன்படுத்தப்பட்டு உள்ளது.

மக்கள் இடம்பெயர நிர்பந்திக்கப்பட்டுள்ளனர். இந்த மூன்று விஷயங்களிலும் அரசு தோல்வி அடைந்து விட்டது. பாஜவைப் பொறுத்தவரை, விவசாயிகளின் நலனே எங்களின் முன்னுரிமை. விவசாயிகள் மற்றும் தொழிலாளர்கள் இருவரின் கவலைகளையும் நாங்கள் புரிந்துகொள்கிறோம். அதனால்தான், கடந்த 11 ஆண்டுகளில், பாஜ அரசு சணலுக்கான குறைந்தபட்ச ஆதரவு விலையை இரட்டிப்பாக்கியுள்ளது.

சணலுக்கான தேவையை அதிகரிப்பதை உறுதி செய்வதற்காக, நாங்கள் சணல் கொள்முதலை மூன்று மடங்கு அதிகரித்துள்ளோம், கோதுமை மற்றும் அரிசிக்கு 100% சணல் பொட்டலங்களைப் பயன்படுத்துவதைக் கட்டாயமாக்கியுள்ளோம், மேலும் ஒருமுறை பயன்படுத்தும் பிளாஸ்டிக்குகளுக்குத் தடை விதித்துள்ளோம்.

இது மேற்கு வங்கத்தில் உள்ள சணல் ஆலைகள் அதிகபட்ச ஆர்டர்களைப் பெறுவதை உறுதி செய்கிறது. இருப்பினும், திரிணமுல் காங்கிரஸின் சிண்டிகேட் இந்த ஆலைகளை இயக்க அனுமதிப்பதில்லை. இங்குள்ள விவசாயிகளின் நலனுக்காக, திரிணமுல் காங்கிரஸ் அரசு விடைபெற வேண்டியிருக்கும். இவ்வாறு பிரதமர் மோடி பேசினார்.