J மற்றும் L தொடருந்து பயணிகளுக்கு Navigo கட்டணம் திருப்பி வழங்கப்படும்!!

J மற்றும் L தொடருந்து பாதைகளில் பல மாதங்களாக ஏற்பட்ட தொழில்நுட்பக் கோளாறுகளால் பயணிகள் கடும் சிரமங்களை எதிர்கொண்டனர். தண்டவாளங்களில் ஏற்பட்ட குறைபாடு காரணமாக பல தொடருந்துகளின் சக்கரங்கள் சேதமடைந்ததால், ரயில் சேவை கடுமையாக பாதிக்கப்பட்டது. இதனால் உச்ச நேரங்களில் கூட வழக்கத்தை விட மிகவும் குறைவான தொடருந்துகள் மட்டுமே இயக்கப்பட்டன.

இந்த நிலைமைக்கு எதிர்ப்பு தெரிவித்து பயணிகள் மனு ஒன்றைத் தொடங்கி, இழப்பீடும் வழக்கமான தொடருந்து சேவையும் மீண்டும் வழங்கப்பட வேண்டும் என்று கோரிக்கை வைத்தனர். மேலும், ஜூன் இறுதியில் ஏற்பட்ட புயலால் சில பகுதிகளில் தொடருந்து போக்குவரத்து ஒரு வாரம் முழுவதும் நிறுத்தப்பட்டதால், பயணிகளின் சிரமம் மேலும் அதிகரித்தது.

இந்தப் பிரச்சினையால் பாதிக்கப்பட்ட பயணிகளுக்கு இழப்பீடு வழங்குவதாக Île-de-France Mobilités (IDFM) அறிவித்துள்ளது. J பாதையில் பயணம் செய்யும் Navigo சந்தாதாரர்களுக்கு ஒரு மாத சந்தா தொகையும், L பாதை பயணிகளுக்கு அரை மாத சந்தா தொகையும் திருப்பி வழங்கப்படும்.

இழப்பீடு பெறுவதற்கான இணையத்தளம் செப்டம்பர் 15 முதல் திறக்கப்படும். J மற்றும் L பாதைகளில் உள்ள பெரும்பாலான நிலையங்களின் பயணிகள் இந்தத் திட்டத்தின் கீழ் பயன் பெறுவார்கள். ஆனால் Paris Saint-Lazare, Pont Cardinet மற்றும் La Défense ஆகிய மூன்று நிலையங்கள் மட்டும் இந்த இழப்பீட்டுத் திட்டத்தில் சேர்க்கப்படவில்லை.