ரஜினிகாந்த் 173 படத்தின் இயக்குனர் மீண்டும் மாற்றம்?

கமல்ஹாசன் தயாரிக்க, ரஜினிகாந்த் நடிக்க உள்ள அவரது 173வது படத்தின் இயக்குனர் மீண்டும் மாற்றப்பட்டுள்ளதாக ஒரு தகவல் வெளியாகி உள்ளது.

இந்தப் படத்தை முதலில் சுந்தர் சி இயக்குவதாக இருந்தது. கடந்த வருடம் நவம்பர் 7ம் தேதி கமல்ஹாசனின் பிறந்தநாளை முன்னிட்டு ஒரு நாள் முன்னதாக நவம்பர் 6ம் தேதி இப்படத்தின் அதிகாரப்பூர்வ அறிவிப்பை வெளியிட்டார்கள். இந்த அறிவிப்பு வெளியான ஒரு வாரத்தில் படத்திலிருந்து விலகுவதாக சுந்தர் சி அறிவித்தார்.

அதன் பின் கடந்த ஜனவரி மாதம் 3ம் தேதி இப்படத்தை சிபி சக்கரவர்த்தி இயக்குவதாக அறிவித்தார்கள். அதோடு படம் 2027 பொங்கலுக்கு வெளியாகும் என்றும் குறிப்பிட்டிருந்தார்கள். அப்படி வெளியாவதாக இருந்தால் இந்நேரம் படம் ஆரம்பமாகி படப்பிடிப்பு நடந்து கொண்டிருக்கும். ஆனால், இதுவரை படப்பிடிப்பு ஆரம்பமாகவில்லை. அதனால், 2027 பொங்கலுக்கு வருவதும் சந்தேகம்தான்.

இதனிடையே, இப்படத்தை அஸ்வத் மாரிமுத்து இயக்க உள்ளதாக ஒரு செய்தி பரவியுள்ளது. 'ஓ மை கடவுளே, டிராகன்' ஆகிய படங்களை இதற்கு முன்பு இவர் இயக்கியுள்ளார்.

இன்று அஸ்வத் மாரிமுத்துவின் பிறந்தநாள். அதை முன்னிட்டு கமல்ஹாசனின் தயாரிப்பு நிறுவனமான ராஜ்கமல் பிலிம்ஸ், அஸ்வத் மாரிமுத்துவுக்கு பிறந்தநாள் வாழ்த்துச் செய்தியை வெளியிட்டுள்ளது. அதனால், ரஜினிகாந்த் 173 படத்தை அஸ்வத் இயக்குவது ஏறக்குறைய உறுதி என்கிறார்கள்.