மலாக்கா நீரிணையில் சுங்கக் கட்டணம் விதிக்க இந்தோனேசியாவுக்குத் திட்டம்...?

மலாக்கா நீரிணை வழியாகச் செல்லும் கப்பல்களுக்குச் சுங்கம் விதிக்க இந்தோனேசியாவுக்குத் திட்டம் ஏதும் இல்லை என்று அதன் நிதியமைச்சர் தெரிவித்துள்ளார்.

இந்த வாரத் தொடக்கத்தில், அந்த முக்கியத்துவம் வாய்ந்த கடல் பாதையை வர்த்தகமயமாக்குவது குறித்த அவரது கருத்துகள் பெரும் பரபரப்பை ஏற்படுத்தியதைத் தொடர்ந்து தற்போது உறுதியளித்துள்ளார்.

தென்கிழக்கு ஆசியாவின் மிகப்பெரிய பொருளாதார நாடான இந்தோனேசியா, மலாக்கா நீரிணையில் எவ்விதத் தீர்வைகளையும் விதிக்காது என, அந்நாட்டின் வெளிவிவகார அமைச்சர் வியாழக்கிழமையன்று அளித்த விளக்கத்தை, நிதியமைச்சர் பூர்பயா யுதி சதேவா மீண்டும் வலியுறுத்தினார்.

ஐக்கிய நாடுகள் சபையின் கடல் சட்ட மரபை இந்தோனேசியா கடைப்பிடிக்கும் என்றும் பூர்பயா செய்தியாளர் கூட்டத்தில் தெரிவித்தார்.

புதன்கிழமை அன்று, நீரிணையை வர்த்தகமயமாக்கும் ஒரு வழியாக, நாடுகள் கப்பல்களுக்குச் சுங்கம் விதிக்கக்கூடிய வழிகள் குறித்து பூர்பயா வெளிப்படையாகக் கருத்துத் தெரிவித்ததோடு, பின்னர் அத்தகைய ஏற்பாடு சாத்தியமில்லை என்றும் குறிப்பிட்டு பரபரப்பை ஏற்படுத்தினார்.

அமெரிக்க எரிசக்தி நிர்வாகத்தால் உலகின் மிகப்பெரிய எண்ணெய் போக்குவரத்து வழித்தடமாக விவரிக்கப்படும், 900 கிலோமீற்றர் நீளமுள்ள மலாக்கா நீரிணையானது, இந்தோனேசியா, தாய்லாந்து, மலேசியா மற்றும் சிங்கப்பூர் ஆகிய நாடுகளால் சூழப்பட்டுள்ளதுடன், கிழக்கு ஆசியாவிலிருந்து மத்திய கிழக்கு மற்றும் ஐரோப்பாவிற்குச் செல்லும் மிகக் குறுகிய கடல்வழிப் பாதையாகவும் திகழ்கிறது.

2024-ஆம் ஆண்டில் சுமார் 94,300-ஆக இருந்த கப்பல்களின் எண்ணிக்கை, 2025-ஆம் ஆண்டில் 102,500-க்கும் அதிகமாக உயர்ந்ததாக மலேசியக் கடல்சார் துறையின் தரவுகள் காட்டுகின்றன; மலாக்கா நீரிணை வழியாகப் பயணித்த இக்கப்பல்களில் பெரும்பாலானவை வர்த்தகக் கப்பல்களாகும்.