விடுமுறைகளைச் செலவிட பல நூறு யூரோக்கள் வரை உதவி!!

Caisse des allocations familiales (CAF) இந்த புதன்கிழமை ஒரு அறிவிப்பில், இளைஞர்களின் விடுமுறை முகாம்கள் (colonies de vacances) மற்றும் தங்கும் பயணங்களுக்கான நிதி உதவியை அதிகரிப்பதாக தெரிவித்துள்ளது. தகுதி நிபந்தனைகள் மற்றும் உதவி தொகைகள் குறித்த  விவரங்களை கீழே காணலாம்.

உங்கள் குழந்தையை விரைவில் விடுமுறை முகாமுக்கு அனுப்ப திட்டமிட்டிருக்கிறீர்களா? அப்படியானால், உங்கள் குடும்ப செலவுக்கு இது ஒரு நல்ல செய்தி.

மார்ச் 11 அன்று வெளியிட்ட அறிக்கையில், “இளைஞர்கள் விடுமுறை முகாம்களுக்கு செல்ல வசதியாக, தங்கும் செலவுகளில் அதிகமான பகுதியை நாங்கள் ஏற்கப் போகிறோம்” என்று தெரிவித்துள்ளது.

குழந்தைகளுக்கான விடுமுறை உதவி (AVE)

இந்த மாற்றங்கள் முக்கியமாக குழந்தைகளுக்கான விடுமுறை உதவி (Aide aux Vacances Enfants – AVE) தொடர்பானவை. இந்த உதவி மூலம், பிரான்ஸ் முழுவதும் அங்கீகரிக்கப்பட்ட விடுமுறை மையங்களில் நடைபெறும்:

• விடுமுறை முகாம்கள்
• சிறிய முகாம்கள்
• குழு தங்கும் விடுமுறை நிகழ்ச்சிகள்

இவற்றின் செலவை குறைக்க முடியும்.

இந்த உதவியை பெற:

• குழந்தையின் வயது 6 முதல் 17 வரை இருக்க வேண்டும்
• குடும்பம் CAF வழங்கும் குடும்ப உதவிகளில் ஒன்றை பெற வேண்டும்
• முன்பு குடும்ப வருமானக் கணக்கு (quotient familial) 800 யூரோ வரை இருந்தால் மட்டுமே தகுதி இருந்தது. இப்போது அது 950 யூரோ வரை உயர்த்தப்பட்டுள்ளது.

மேலும், தங்கும் செலவில் CAF ஏற்கும் பகுதியும் 70% முதல் 80% வரை அதிகரிக்கப்பட்டுள்ளது.

உதவி தொகை விவரம்

• குடும்ப வருமான அளவு 350 யூரோ அல்லது அதற்குக் குறைவாக இருந்தால் → 80% செலவை CAF ஏற்கும்
• 351 – 500 யூரோ இருந்தால் → 75% செலவை CAF ஏற்கும்
• 501 – 950 யூரோ இருந்தால் → 70% செலவை CAF ஏற்கும்

உதாரணமாக:

8 நாட்கள் விடுமுறை முகாம் 300 யூரோ என்றால், CAF 225 யூரோ (75%) செலுத்தும். குடும்பம் 75 யூரோ மட்டும் செலுத்தினால் போதும்.

CAF கூறுவதாவது: இந்த மாற்றத்தின் நோக்கம் மேலும் பல குடும்பங்களுக்கு விடுமுறை வாய்ப்பை வழங்குவது. முன்பணம் செலுத்த தேவையில்லை

ஆனால் சில கூடுதல் நிபந்தனைகளும் உள்ளன:

1. பிரான்ஸ் முழுவதும் உள்ள 3,600 Vacaf அங்கீகரிக்கப்பட்ட விடுமுறை கிராமங்கள் மற்றும் முகாம்களில் ஒன்றை தேர்வு செய்ய வேண்டும். முழு பட்டியல்: vacaf.org இணையதளத்தில் கிடைக்கும்
2. குழந்தையின் தங்கும் காலம்: குறைந்தபட்சம் 5 நாட்கள் தொடர்ச்சியாக இருக்க வேண்டும். குளிர்கால, வசந்த, கோடை அல்லது இலையுதிர் கால பள்ளி விடுமுறைகளில் நடைபெற வேண்டும்
3. இடம்: பிரான்ஸ், ஐக்கிய இராச்சியம் அல்லது ஐரோப்பிய ஒன்றிய நாடுகள்

CAF அதிகபட்சமாக 10 முதல் 15 நாட்கள் வரை உதவி வழங்கும் (உங்கள் CAF அலுவலகத்தைப் பொறுத்தது).

இந்த உதவி ஜனவரி 2027 வரை செல்லுபடியாகும். ஆனால் ஒரு ஆண்டில் ஒரே முறை மட்டுமே பயன்படுத்தலாம்.

மேலும், வருடாந்திர நிதி முடிந்துவிட்டால், தகுதி இருந்தாலும் உதவி வழங்க முடியாது என்று அரசு சேவை தளம் குறிப்பிடுகிறது.

தகுதி பெற்ற குடும்பங்களுக்கு, caf.fr தளத்தில் உள்ள “Mon compte” பகுதியில் உதவி தொகை குறித்து அறிவிப்பு வரும். பின்னர் அவர்கள் vacaf.org தளத்தில் தங்கும் இடத்தை தேர்வு செய்தால், CAF அந்த தொகையை நேரடியாக விடுமுறை அமைப்புக்கு செலுத்தும். இதனால் குடும்பங்கள் முன்பணம் செலுத்த வேண்டியதில்லை.

மற்ற உதவிகளுடன் சேர்த்து பெறலாம்

AVE உதவியை CAF வழங்கும் பிற உதவிகளுடன் சேர்த்து பெறலாம்:

• குடும்ப விடுமுறை உதவி (AVF) – அதிகபட்சம் 1,100 யூரோ வரை கிடைக்கும்.
• Pass Colo – 2015ல் பிறந்த குழந்தைகளுக்கு 200 முதல் 350 யூரோ வரை அரசின் உதவி
• மேலும், பள்ளி ஆண்டில் குழந்தைகளின் பொழுதுபோக்கு நடவடிக்கைகளுக்கான CAF அல்லது MSA வழங்கும்: ஓய்வு/விளையாட்டு உதவிகள், loisirs vouchers,tickets loisirsஐ இவற்றுடனும் சேர்த்து பயன்படுத்தலாம்.
• அதேபோல், விடுமுறை காசோலைகள் (chèques-vacances) பயன்படுத்தி குடும்ப நடவடிக்கைகள் அல்லது உணவக செலவுகளையும் குறைக்க முடியும்.