UNSS மீது சைபர் தாக்குதல்: சிறார்களின் புகைப்படங்கள் உட்பட தரவுகள் இணையத்தில் வெளியீடு!!

பரிஸ் பாடசாலை விளையாட்டு இயக்கத்தின் முக்கிய அமைப்பான UNSS (Union nationale du sport scolaire) மீது நடத்தப்பட்ட சைபர் தாக்குதலுக்குப் பிறகு, சிறார்களைப் பற்றிய தகவல்கள் மற்றும் அவர்களின் அடையாளப் புகைப்படங்களுக்கு இணைப்புகள் இணையத்தில் வெளியிடப்பட்டுள்ளன.

இந்தத் தகவல்கள் நவம்பர் மாதத்தில் திருடப்பட்டதாகவும், சனிக்கிழமை ஆன்லைனில் வெளியிடப்பட்டதாகவும் UNSS தெரிவித்துள்ளது. இவை நடுநிலை மற்றும் உயர்நிலைப் பாடசாலை மாணவர்களின் அடையாளப் புகைப்படங்களுக்கு வழிகாட்டும் URL இணைப்புகளை உள்ளடக்கியிருந்தாலும், அந்த இணைப்புகள் தற்போது செயலிழக்கச் செய்யப்பட்டுள்ளன என்று அமைப்பு உறுதி செய்துள்ளது.

கல்லூரி மற்றும் உயர்நிலைப் பள்ளிகளுக்கிடையேயான விளையாட்டு போட்டிகளை ஏற்பாடு செய்யும் இந்த அமைப்பு ஆண்டுதோறும் 11 முதல் 18 வயதுடைய 12 லட்சம் மாணவர்களை உள்ளடக்கியுள்ளது மற்றும் கல்வி அமைச்சின் மேற்பார்வையில் செயல்படுகிறது. 

தரவு கசிவுகளை கண்காணிக்கும் French Breaches அமைப்பின் தகவலின்படி, “65 ஜிகாபைட் அளவிலான நுணுக்கமான தரவுகள்”, அதில் “15,57,000 மாணவர்களின் புகைப்படங்கள்” உள்ளிட்டவை DumpSec என்ற ஹேக்கர் குழுவால் வெளியிடப்பட்டிருக்கலாம். ஆனால், இந்த எண்ணிக்கைகளை UNSS உறுதிப்படுத்தவில்லை.

இந்தச் சம்பவம் Cnil (Commission nationale de l'informatique et des libertés) மற்றும் Anssi (Agence nationale de la sécurité des systèmes d'information) ஆகிய அதிகாரப்பூர்வ அமைப்புகளுக்கு அறிவிக்கப்பட்டுள்ளது.

பாதிக்கப்பட்டிருக்கக்கூடிய தகவல்களில்:

• மாணவர்களின் பெயர்கள்
• உள்நுழைவு அடையாளங்கள்
• பிறந்த தேதிகள்
• அவர்கள் பயிலும் கல்வி நிறுவனங்கள்
• காப்பீட்டு விவரங்கள்
• அடையாளப் புகைப்படங்களுக்கு இணைப்புகள்

அடங்கும் என்று UNSS தெரிவித்துள்ளது.

“புகைப்படங்களை அணுக உதவும் இணைப்புகள் செயலிழக்கச் செய்யப்பட்டுள்ளன,” எனவும், குடும்பங்களின் வங்கி விவரங்கள் (RIB, SEPA அனுமதிகள் போன்றவை) மற்றும் மாற்றுத் திறனாளித்தன்மை தொடர்பான தகவல்கள் இதில் பாதிக்கப்படவில்லை எனவும் அமைப்பு கூறியுள்ளது.