Melun : காவல்துறையினரின் அதிரடியில் 14 பேர் கைது.. €150,000 பறிமுதல்..!!

போதைப்பொருள் தடுப்பு காவல்துறையினர் மேற்கொண்ட அதிரடியான சுற்றிவளைப்பில் 14 பேர் கைது செய்யப்பட்டுள்ளனர். €150,000 பணமும், பல்வேறு ஆயுதங்களும் பறிமுதல் செய்யப்பட்டுள்ளன.

இந்த நடவடிக்கை நேற்று முன்தினம் செவ்வாய்க்கிழமை Melun (Seine-et-Marne) நகரில் இடம்பெற்றுள்ளது. BRI மற்றும் போதைப்பொருள் தடுப்பு காவல்துறையினர் என மொத்தமாக 200 பேர் வரை இந்த நடவடிக்கையில் ஈடுபட்டனர். பல்வேறு இடங்கள், வீடுகள் சுற்றிவளைக்கப்பட்டு தேடுதல் மேற்கொள்ளப்பட்டது. 

குறிப்பாக rue Claude-Bernard வீதியில் உள்ள மூன்று கட்டிடங்கள் ஒரே நேரத்தில் சோதனையிடப்பட்டது.

இந்த நடவடிக்கையின் முடிவில் 21 தொடக்கம் 49 வரை வயதுடைய 14 பேர் கைது செய்யப்பட்டனர். 2 கிலோ கொக்கைன், 5.5 கிலோ கஞ்சா, துப்பாக்கிகள், துப்பாக்கிச் சன்னங்கள், 150,000 யூரோக்கள் பணம் போன்றவை மீட்கப்பட்டன. இரண்டு வாகங்களும் பறிமுதல் செய்யப்பட்டுள்ளன. 

இவ்வருடத்தில் குறித்த மாவட்டத்தில் இடம்பெற்ற மிகப்பெரிய நடவடிக்கை இது என காவல்துறையினர் தெரிவித்தனர்.