‘துருவ நட்சத்திரம்’ படத்தின் முக்கிய அறிவிப்பு!

விக்ரம் நடிப்பில் துருவ நட்சத்திரம் திரைப்படம் உருவாகியுள்ளது. இதனை கௌதம் வாசுதேவ் மேனன் இயக்கியுள்ளார். ஒன்றாக என்டர்டைன்மென்ட் நிறுவனம் தயாரித்துள்ள இந்த படத்திற்கு ஹாரிஸ் ஜெயராஜ் இசை அமைத்துள்ளார். இதில் விக்ரமுடன் இணைந்து ராதிகா சரத்குமார்,ரித்து வர்மா, சிம்ரன், விநாயகன், திவ்யதர்ஷினி மற்றும் பலர் நடித்துள்ளனர். 

சமீபத்தில் படத்தின் பாடல்கள் வெளியாகி ரசிகர்களிடையே வரவேற்பை பெற்றது. இதற்கிடையில் சில ஆண்டுகளுக்கு முன்பாகவே படத்தின் டீசர் வெளியாகி கவனம் பெற்றது. இப்படம் கடந்த 2017 ஆம் ஆண்டில் தொடங்கப்பட்டு நீண்ட நாள் நிலுவையில் இருந்து வருகிறது.மேலும் துருவ நட்சத்திரம் திரைப்படம் தீபாவளியை முன்னிட்டு வெளியாக இருப்பதாக நம்ப தகுந்த வட்டாரங்கள் தெரிவிக்கின்றன. இந்நிலையில் இந்த படத்தின் முக்கிய அறிவிப்பு நாளை காலை 11 மணியளவில் வெளியாகும் என்று படக்குழுவினர் போஸ்டர் ஒன்றை வெளியிட்டு அறிவித்துள்ளனர்.