‘ராக்கா’ படப்பிடிப்பில் இணையும் நடிகை ராஷ்மிகா மந்தனா?

ஹிந்தியில் கடந்த ஜூன் 19ஆம் தேதி ஷாகித் கபூர், கிரித்தி சனோன் மற்றும் ராஷ்மிகா மந்தனா நடித்த ‘காக்டெய்ல்-2’ திரைப்படம் வெளியாகியது. அதனைத் தொடர்ந்து விஜய் தேவரகொண்டாவுடன் ‘ரணபாலி’ மற்றும் ‘மைசா’ உள்ளிட்ட படங்களில் ராஷ்மிகா மந்தனா பிஸியாக நடித்து வருகிறார்.

இந்த நிலையில், அல்லு அர்ஜுன் கதாநாயகனாகவும் அட்லி இயக்கத்திலும் உருவாகி வரும் பிரம்மாண்ட சர்வதேச ஆக்சன் திரைப்படமான ‘ராக்கா’ வில் ராஷ்மிகா மந்தனா இணைந்துள்ளதாக தகவல்கள் வெளியாகியுள்ளன. ஜூலை மாதம் முதல் தனது காட்சிகளுக்கான படப்பிடிப்பில் அவர் பங்கேற்க உள்ளதாகவும் கூறப்படுகிறது. இந்த தகவல் அதிகாரப்பூர்வமாக உறுதிப்படுத்தப்பட்டால், ‘புஷ்பா’ மற்றும் ‘புஷ்பா-2’ படங்களுக்குப் பிறகு அல்லு அர்ஜுனுடன் ராஷ்மிகா இணையும் மூன்றாவது திரைப்படமாக ‘ராக்கா’ அமையும்.

இந்தப் படம் இந்திய சினிமாவில் தற்போது தயாரிப்பில் உள்ள மிகப்பெரிய பட்ஜெட் திரைப்படங்களில் ஒன்றாக உருவாகி வருகிறது. பிரம்மாண்டமான விஷுவல் எஃபெக்ட்ஸ், சர்வதேச தரத்தில் உருவாக்கப்படும் சண்டைக் காட்சிகள் உள்ளிட்ட அம்சங்களுடன் படம் தயாராகி வருகிறது. ஹாலிவுட் தொழில்நுட்ப வல்லுநர்களும், வெளிநாட்டு ஸ்டுடியோக்களும் இப்படத்தின் தொழில்நுட்ப பணிகளில் ஈடுபட்டு வருகின்றனர். ஏற்கனவே அல்லு அர்ஜுனின் பர்ஸ்ட் லுக் போஸ்டர் வெளியாகி கவனம் பெற்ற நிலையில், வரும் ஆகஸ்ட் மாதத்தில் படத்தின் சிறப்பு முன்னோட்ட வீடியோ வெளியாகும் என எதிர்பார்க்கப்படுகிறது. மேலும், தீபிகா படுகோனே கதாநாயகியாக நடிக்கும் இந்தப் படத்தில் ராஷ்மிகா மந்தனா எதிர்மறை கதாபாத்திரத்தில் நடிக்கிறார் என்ற தகவலும் பரவி வருகிறது. எனினும், இதுகுறித்து படக்குழு இதுவரை எந்த அதிகாரப்பூர்வ அறிவிப்பையும் வெளியிடவில்லை.