கோதுமை பிரெட்

குழந்தைகள் முதல் பெரியவர்கள் வரை அனைவரும் விரும்பி சாப்பிடும் உணவாக பிரெட் உள்ளது. இது காலை உணவு மற்றும் மாலை நேர சிற்றுண்டியாக உலகம் முழுவதும் பரவலாகப் பயன்படுத்தப்படுகிறது. ஆனால் கடைகளில் விற்கப்படும் பிரெட் துண்டுகள் பெரும்பாலும் சுத்திகரிக்கப்பட்ட மாவு, பதப்படுத்திகள் மற்றும் வெள்ளை சர்க்கரையுடன் தயாரிக்கப்படுகின்றன.

நீங்கள் ஆரோக்கியமான, வீட்டிலேயே தயாரிக்கக்கூடிய ஒரு விருப்பத்தைத் தேடுகிறீர்கள் என்றால் கோதுமை பிரெட் ஒரு சிறந்த தேர்வாக இருக்கும். கோதுமை மாவினால் செய்யப்படும் பிரெட்டில் நார்ச்சத்து அதிகமாக உள்ளது, மேலும் இது உங்களை நீண்ட நேரம் வயிறு நிறைந்ததாக வைத்திருக்க உதவும். மேலும் இதை வீட்டிலேயே தயாரிப்பது மிகவும் எளிதானது மற்றும் இதற்கு எந்த சிறப்பு பொருட்களும் தேவையில்லை.

வீட்டில் கோதுமை பிரெட் தயாரிக்க 3 கப் கோதுமை மாவு, 1 கப் வெதுவெதுப்பான பால் அல்லது தண்ணீர், 2 டீஸ்பூன் தேன் அல்லது சர்க்கரை, 1 டீஸ்பூன் இன்ஸ்டன்ட் ஈஸ்ட், 2 டீஸ்பூன் எண்ணெய் அல்லது வெண்ணெய், மற்றும் 1/2 டீஸ்பூன் உப்பு ஆகியவற்றை எடுத்து வைத்துக்கொள்ளுங்கள்.

ஈஸ்ட்டைத் தயார் செய்யவும் : ஒரு பாத்திரத்தில் வெதுவெதுப்பான நீரை ஊற்றி அதில் தேன் அல்லது சர்க்கரையை சேர்த்து கலந்துகொள்ளுங்கள். அதில் ஈஸ்ட்டை சேர்த்து 5 முதல் 10 நிமிடங்கள் அப்படியே விடவும். ஈஸ்ட் வீரியமாக இருந்தால் கலவையின் மேல் நுரை உருவாகும். இது ரொட்டி நன்றாக பொங்கி வரும் என்பதை குறிக்கிறது. ஆனால் நுரை உருவாகவில்லை என்றால் புதிய ஈஸ்ட்டைப் பயன்படுத்துவது சிறந்தது.

மாவைப் பிசையவும் : ஒரு பெரிய பாத்திரத்தில் கோதுமை மாவு மற்றும் உப்பை சேர்த்து நன்றாக கலந்துகொள்ளுங்கள். பிறகு அதில் தயாரிக்கப்பட்ட ஈஸ்ட் கலவை மற்றும் எண்ணெயை சேர்க்கவும். படிப்படியாக தண்ணீர் அல்லது பால் சேர்த்து மென்மையான மாவாக பிசையவும். மாவு மிருதுவாக மாறும் வரை சுமார் 8 முதல் 10 நிமிடங்கள் வரை நன்கு பிசையவும். இது ரொட்டியின் தன்மையை மேம்படுத்தும்.

மாவு உப்பட்டும் : பிசைந்த மாவில் சிறிதளவு எண்ணெய் தடவி மூடி சூடான இடத்தில் 1 முதல் 1.5 மணி நேரம் புளிக்க விடவும். இந்த நேரத்தில் மாவு அதன் அளவில் ஏறக்குறைய இருமடங்காகும். பிறகு, மாவில் உள்ள அதிகப்படியான காற்றை வெளியேற்றி அதை மெதுவாக அழுத்தி ரொட்டி வடிவில் உருட்டவும்.

சரியான முறையில் பேக்கிங் செய்வது : ஒரு பிரெட் டின்னில் லேசாக எண்ணெய் தடவி தயாரிக்கப்பட்ட மாவை அதில் வைத்து மூடி 30 முதல் 40 நிமிடங்கள் வரை அது லேசாக உப்பி வரும் வர விடவும். 180°C-க்கு முன்கூட்டியே சூடுபடுத்தப்பட்ட ஓவனில் 30 முதல் 35 நிமிடங்கள் வரை மேல்புறம் பொன்னிறமாக மாறும்வரை விட்டால் ஆரோக்கியமான கோதுமை ​​பிரெட் தயாராகிவிடும்.