திருச்சி கிழக்கில் போட்டியிடும் தவெக வேட்பாளர்; விஜய் பரிசீலனையில் இருவர்...!

திருச்சி கிழக்கு தொகுதியில் தவெக சார்பில் போட்டியிடுவதற்காக இருவரின் பெயர்களை விஜய் பரிசீலனை செய்து வருவதாக தகவல் வெளியாகியுள்ளது.

தமிழக சட்டசபை தேர்தலில் திராவிட கட்சிகளுக்கு அதிர்ச்சி கொடுத்து, விஜயின் தவெக அரியணை ஏற ஆயத்தமாகி வருகிறது.  ஆட்சியமைக்கத் தேவையான ஆதரவு குறித்து விஜய் பேச்சுவார்த்தை நடத்தி வருகிறார். அதேவேளையில், தான் போட்டியிட்டு வெற்றி பெற்ற இரு தொகுதிகளில், திருச்சி கிழக்கு தொகுதி பதவியை ராஜினாமா செய்ய முடிவு செய்துள்ளார்.

ஒருவர் ஒரு தொகுதியில் மட்டுமே எம்எல்ஏவாக இருக்க முடியும் என்பதால், பெரம்பூர் தொகுதி எம்எல்ஏவாக செயல்பட அவர் திட்டமிட்டுள்ளார். ஏனெனில், பெரம்பூர் சென்னையில் இருப்பதால், தொகுதி பணிகளை சிரமம் இல்லாமல் நேரில் சென்று கவனிக்க முடியும் என்பதால் இந்த முடிவை அவர் எடுத்துள்ளார்.

தேர்தல் முடிவுகள் அறிவிக்கப்பட்ட இரு வாரங்களுக்குள் ஒரு பதவியை ராஜினாமா செய்ய வேண்டும் என்பதால்,  வரும் 18ம் தேதிக்குள் திருச்சி கிழக்கு தொகுதி எம்எல்ஏ பதவியை அவர் ராஜினாமா செய்வார் என்று எதிர்பார்க்கப்படுகிறது. ஏற்கனவே ஆட்சியமைக்க போதிய எண்ணிக்கையிலான எம்எல்ஏக்கள் இல்லாததால், திருச்சி கிழக்கில் மீண்டும் வெற்றி பெற வேண்டியது தவெகவுக்கு மிகவும் அவசியமானதாகும்.

இந்த நிலையில், விஜய் போட்டியிட்ட திருச்சி கிழக்கு தொகுதியில் கு.ப.கிருஷ்ணனை களமிறக்க விஜய் திட்டமிட்டுள்ளதாக தகவல் வெளியாகியுள்ளது.முன்னாள் அதிமுக அமைச்சரான இவர், தவெகவில் இணைந்து நடந்து முடிந்த சட்டசபை தேர்தலில் லால்குடி தொகுதியில் போட்டியிட்டார். ஆனால், அதிமுக வேட்பாளர் லீமா ரோஸிடம் 2,739 ஓட்டு வித்தியாசத்தில் தோல்வியை தழுவியிருந்தார்.

தற்போது, கு.ப.கிருஷ்ணனை திருச்சி கிழக்கு தொகுதியில் போட்டியிட வைக்க விஜய் ஆலோசித்து வருவதாக தகவல் வெளியாகியுள்ளது. இது தொடர்பாக நேற்று பட்டினம்பாக்கம் கட்சி அலுவலகத்தில் விஜயை சந்தித்து பேச்சுவார்த்தை நடத்தியுள்ளார். அதேபோல, முன்னாள் ஐஏஎஸ் அதிகாரி சகாயத்தை நிறுத்துமாறு தவெக சார்பில் விஜய்க்கு கோரிக்கை விடுக்கப்பட்டுள்ளதாக மற்றொரு தகவலும் உலா வருகிறது.

சகாயத்தை நிறுத்தி வெற்றி பெற்று விட்டால், திமுக ஆட்சியில் முக்கிய பிரச்னையாக இருந்த கனிம வள கொள்ளையைத் தடுக்கத் தனித்துறையை உருவாக்கலாம் என்றும் விஜய்க்கு யோசனைக்கு வழங்கியிருப்பதாக தவெகவினர் தெரிவிக்கின்றனர். திருச்சி கிழக்கில் தோல்வியடைந்த திமுக வேட்பாளர் இனிகோ இருதயராஜ் கிறிஸ்துவர் என்பதால்,  அதே மதத்தைச் சேர்ந்த சகாயத்தை நிறுத்தவே அதிக வாய்ப்புகள் இருப்பதாக தகவல் வெளியாகியுள்ளது.