டேட்டிங் ஆப் மூலம் நடக்கும் பில் மோசடி

டெல்லி, மும்பை போன்ற பெருநகரங்களில் டேட்டிங் ஆப் மூலம் நடக்கும் 'பில் மோசடிகள்' (Bill Traps) தற்போது சமூக வலைதளங்களில் பேசுபொருளாக மாறியுள்ளன. குறிப்பிட்ட சில கிளப்கள் அல்லது லவுஞ்ச்களுக்கு வரவழைத்து, அங்கு ஆயிரக்கணக்கில் பில் போட்டு ஏமாற்றும் கும்பல் கைவரிசை காட்டி வருகிறது. கொஞ்சம் உஷாராக இருந்தால் மட்டுமே இத்தகைய திட்டமிட்ட பண இழப்புகளில் இருந்து தப்பிக்க முடியும்.

இந்த மோசடி கும்பல் ஒரு குறிப்பிட்ட பாணியைத்தான் பின்பற்றுகிறது. டேட்டிங் ஆப்பில் அறிமுகமான உடனேயே, தங்களுக்குத் தெரிந்த ஒரு கஃபே அல்லது கிளப்பிற்கு வருமாறு வற்புறுத்துவார்கள். பெரும்பாலும் அந்த இடங்களுக்கு ஆன்லைனில் ரிவியூக்கள் இருக்காது, மெனு கார்டும் தரமாட்டார்கள்.

இதைப் பயன்படுத்தி, ஆர்டர் செய்யும் சாதாரண உணவுகளுக்குக் கூட பல மடங்கு கூடுதல் விலையை வசூலிப்பார்கள்.

கிளப் மற்றும் லவுஞ்ச் மோசடிகளை முன்கூட்டியே கண்டறிவது எப்படி?

ஆரம்பகட்ட உரையாடலின் போதே சில விஷயங்களைக் கவனித்தால் இந்த மோசடியில் இருந்து தப்பிக்கலாம். மால்கள் போன்ற பொது இடங்களுக்கு வர மறுத்து, தங்களுக்குப் பிடித்தமான கிளப்பிற்கு மட்டுமே வருமாறு வற்புறுத்தினால் உஷாராகிவிடுங்கள். உங்கள் பின்னணியைச் சரிபார்க்கும் முன்பே, அவசரமாக நேரில் சந்திக்கத் துடிப்பது இவர்களின் முக்கிய அடையாளமாகும்.

எச்சரிக்கை அறிகுறிகள் 
குறிப்பிட்ட லவுஞ்சிற்கு மட்டுமே வருமாறு வற்புறுத்துவது
தெளிவான விவரங்களைத் தர மறுப்பது 
மெனு பார்க்காமல் பொருட்களை ஆர்டர் செய்வது

பாதுகாப்பான டேட்டிங் முறைகள்
பொதுவான ஃபுட் கோர்ட்டுகளில் சந்திப்பது 
வீடியோ கால் மூலம் உண்மைத்தன்மையை உறுதிப்படுத்துவது 
ஆர்டர் செய்வது ஆர்டர் செய்யும் முன் விலையைச் சரிபார்ப்பது

ஒருவேளை நீங்கள் இத்தகைய சூழலில் சிக்கிக்கொண்டால், பதற்றப்படாமல் நிதானமாகச் செயல்படுங்கள். நீங்கள் சாப்பிட்ட பொருட்களுக்கு மட்டும் பணம் தருவதாகத் தெளிவாகக் கூறிவிடுங்கள். அங்கிருந்து வெளியேற முயற்சி செய்யுங்கள் அல்லது நண்பர்களுக்குத் தகவல் தெரிவியுங்கள். பவுன்சர்களுடன் வீண் வாக்குவாதத்தில் ஈடுபடாமல், பாதுகாப்பான இடத்திற்குச் செல்வதே நல்லது.

மோசடி குறித்து அதிகாரிகளிடம் புகார் அளிப்பது எப்படி? இத்தகைய சம்பவங்கள் குறித்து உடனடியாகப் புகார் அளிப்பது மற்றவர்கள் ஏமாறுவதைத் தவிர்க்க உதவும். 1930 என்ற தேசிய உதவி எண்ணைத் தொடர்புகொண்டு உங்கள் புகாரைப் பதிவு செய்யலாம். மேலும், அதிகாரப்பூர்வ இணையதளத்திலும் ஆன்லைன் மூலம் புகார் அளிக்கலாம். இத்தகைய திட்டமிட்ட மோசடிகளைத் தடுக்க இந்தப் புகார்கள் மிகவும் அவசியம். டேட்டிங் ஆப் பயன்படுத்தும்போது கூடுதல் விழிப்புணர்வு மற்றும் உள்ளுணர்வு அவசியம். முதல் சந்திப்பிற்கு எப்போதும் மக்கள் நடமாட்டம் உள்ள, நன்கு தெரிந்த பொதுவான இடங்களையே தேர்வு செய்யுங்கள். உங்கள் 'லைவ் லொகேஷனை' குடும்பத்தினர் அல்லது நண்பர்களுடன் பகிர்வது கூடுதல் பாதுகாப்பைத் தரும். விழிப்புணர்வுடன் இருப்பதே இத்தகைய மோசடிகளில் இருந்து தற்காத்துக் கொள்ளச் சிறந்த வழி.