எப்ஸ்டீனின் பரிஸ் குடியிருப்பு பாலியல் குற்றங்களின் மேடையாக இருந்ததா?' ONG விசாரணையை மீண்டும் தொடங்க கோரிக்கை!!

ஜெஃப்ரி எப்ஸ்டீனின் (Jeffrey Epstein) பரிஸ் குடியிருப்பு மாடி பிரெஞ்சு மண்ணில் பாலியல் குற்றங்கள் நடைபெற்ற இடமாக இருந்ததா என்ற சந்தேகத்தை முன்வைத்து, சிறார்களுக்கு எதிரான பாலியல் வன்முறைகளை எதிர்த்து செயல்படும் பிரெஞ்சு என்ஜிஓ (ONG) “Innocence en danger”, 2019-ஆம் ஆண்டு தொடங்கப்பட்ட விசாரணையை மீண்டும் திறக்க வேண்டும் என்று கோருகிறது. 

ஜனவரி 30 அன்று வெளியான புதிய ஆவணங்கள், எப்ஸ்டீனின் பரிஸ் குடியிருப்பின் முக்கியத்துவத்தை மீண்டும் வெளிச்சத்திற்கு கொண்டு வந்துள்ளன. 2019-இல் நடைபெற்ற விசாரணையின் போது, avenue Foch பகுதியில் உள்ள எப்ஸ்டீனின் ஆடம்பரமான 800m2 குடியிருப்பில் சோதனை நடத்தப்பட்டு, இளம் மற்றும் நிர்வாண பெண்களின் புகைப்படங்கள் பல இடங்களில் கண்டுபிடிக்கப்பட்டன. 

அதே வழக்கில், மாடலிங் இயக்குநர் Jean-Luc Brunel,  மீது குற்றச்சாட்டுகள் பதிவு செய்யப்பட்டன. பல பாதிக்கப்பட்டவர்கள் தங்களின் சிறுவயதில் பாலியல் வன்முறைக்கு உள்ளானதாக சாட்சியம் அளித்தனர். “தீவிர பாலியல் பலாத்காரம்” குற்றச்சாட்டில் விசாரணை எதிர்கொண்ட ஜோன்-லூக் புருனெல், 2022-இல் சிறைச்சாலையில் மரணமடைந்ததைத் தொடர்ந்து, விசாரணை முடிவடைந்தது. 

ஆனால் சம்பவங்களின் போது சிறார்களாக இருந்த பல பாதிக்கப்பட்டவர்கள், இரகசிய ஒப்பந்தங்களால் இதுவரை வெளியில் பேசவில்லை என என்ஜிஓ தெரிவிக்கிறது. இதனால், சாத்தியமான பாதிக்கப்பட்டவர்களை அடையாளம் காண புதிய விசாரணை அவசியம் என வலியுறுத்தப்படுகிறது. இதற்கிடையில், வெளியிடப்பட்ட ஆவணங்களில் சில பிரெஞ்சு பிரபலங்களின் பெயர்களும் இடம்பெற்றுள்ளன. 

அவர்கள் மீது நேரடி குற்றச்சாட்டுகள் எதுவும் இல்லாவிட்டாலும், எப்ஸ்டீனுடன் ஏற்பட்ட தொடர்புகள் குறித்து விளக்கங்கள் கோரப்பட்டுள்ளன. முன்னாள் கலாச்சார அமைச்சர் ஜாக் லாங் (Jack Lang) தனது பதவியிலிருந்து விலக முன்மொழிந்துள்ள நிலையில், இந்த விவகாரம் பிரான்சில் தொடர்ந்து அரசியல் மற்றும் சமூக அதிர்வுகளை ஏற்படுத்தி வருகிறது.

அதேபோல், Edmond de Rothschild குழுமத்தின் தலைவரான வங்கி அதிகாரி Ariane de Rothschild குற்றம் சாட்டப்பட்ட அவர், வணிக ஆலோசனைகளுக்கான தொடர்புகளின் போது “ஜெஃப்ரி எப்ஸ்டீனின் தனிப்பட்ட நடத்தை அல்லது செயல்கள் குறித்து எனக்கு எந்த அறிவும் இல்லை” என்று தெரிவித்துள்ளார். மேலும் முன்னாள் ஜனாதிபதி நிக்கோலா சர்கோசியின் முன்னாள் தூதரக ஆலோசகர் ஒலிவியே கொலோம்  (Olivier Colom) மற்றும் திரைப்பட இயக்குநர் Michel Hazanaviciusம் குற்றம் சாட்டப்பட்டுள்ளனர்.