டிஜிட்டல் அடையாள அட்டையை பயன்படுத்தி விமானப் பயணம்!!

2026ஆம் ஆண்டின் கோடை காலத்திலிருந்து, பிரான்ஸ் விமான நிலையங்களில் விமானத்தில் ஏறும் போது France Identité செயலியின் மூலம் உங்கள் டிஜிட்டல் அடையாள அட்டையை ஸ்மார்ட்போனில் காட்டி பயணம் செய்யலாம் என்று Direction générale de l’aviation civile (DGAC) அறிவித்துள்ளது. 

2024ஆம் ஆண்டு அறிமுகமான இந்த செயலி, தேசிய அடையாள அட்டை, ஓட்டுநர் உரிமம், வாகன பதிவு சான்றிதழ் போன்றவற்றை பாதுகாப்பாக சேமிக்கவும், பல ஆன்லைன் சேவைகளை பயன்படுத்தவும் உதவுகிறது. தற்போது இதற்கு சுமார் 3.6 மில்லியன் பயனர்கள் உள்ளனர்.

இந்த புதிய நடைமுறை முதலில் உள்நாட்டு விமான பயணங்களுக்கும், பாஸ்போர்ட் தேவையில்லாத சில ஐரோப்பிய பயணங்களுக்கும் பயன்படுத்தப்படும். டிக்கெட் மற்றும் அடையாள அட்டை ஒரே சாதனத்தில் இருப்பதால் பயணிகளுக்கு இது வசதியாக இருக்கும். மேலும், விமான நிலையங்களில் காத்திருப்பு நேரத்தை குறைக்க உதவும் என DGAC எதிர்பார்க்கிறது.

ஆனால், இந்த டிஜிட்டல் அடையாளம் தற்போது விமானத்தில் ஏறும் கட்டத்திற்கே பொருந்தும்; பாதுகாப்பு சோதனைகள் அல்லது எல்லை கட்டுப்பாடுகளில் ஆவணங்கள் இன்னும் தேவையாக இருக்கலாம். ஐரோப்பிய ஒன்றியத்திற்கு வெளியே உள்ள சர்வதேச பயணங்களுக்கு இது பொருந்தாது.