இஸ்ரேலின் கொள்கைகளுக்கு எதிராக ட்ரம்ப் - நெதன்யாகு எதிர்ப்பு

காஸா நிர்வாகக் குழு அமைக்கப்பட்டது குறித்து ட்ரம்ப் நிர்வாகம் வெளியிட்ட அறிவிப்பு இஸ்ரேலுடன் கலந்தாலோசிக்கப்படவில்லை என்றும், அது அரசாங்கக் கொள்கைக்கு முரணானது என்றும் நெதன்யாகுவின் அலுவலகம் தெரிவித்துள்ளது.

இஸ்ரேலின் வெளிவிவகார அமைச்சர் கிடியோன் ஸார் இந்த விவகாரத்தை அமெரிக்க வெளிவிவகாரச் செயலாளர் மார்கோ ரூபியோவிடம் முன்னெடுப்பார் என்றும் பிரதமர் அலுவலகம் குறிப்பிட்டுள்ளது.

அந்த அறிக்கையில், நிர்வாகக் குழு அமைப்பில் எந்தப் பகுதி இஸ்ரேலியக் கொள்கைக்கு முரணானது என்பது குறிப்பிடப்படவில்லை. 

வெள்ளிக்கிழமை அன்று வெள்ளை மாளிகையால் வெளியிடப்பட்ட இந்த நிர்வாகக் குழுவில் துருக்கிய வெளிவிவகார அமைச்சர் ஹக்கன் ஃபிடான் இடம்பெற்றுள்ளார்.

காஸாவில் துருக்கியின் எந்தவொரு பங்களிப்பையும் இஸ்ரேல் தொடர்ச்சியாக எதிர்த்து வருகிறது. நிர்வாகக் குழுவின் மற்ற உறுப்பினர்களில், மத்திய கிழக்கு அமைதி செயல்முறைக்கான ஐ.நா.வின் சிறப்பு ஒருங்கிணைப்பாளர் சிக்ரிட் காக்,
இஸ்ரேலிய-சைப்ரிய கோடீஸ்வரர் ஒருவர் மற்றும் 2020-ல் இஸ்ரேலுடன் உறவுகளை ஏற்படுத்திக்கொண்ட ஐக்கிய அரபு அமீரகத்தைச் சேர்ந்த ஒரு அமைச்சர் ஆகியோரும் அடங்குவர்.

இதனிடையே, காஸாவில் போரை முடிவுக்குக் கொண்டு வருவதற்காக ஜனாதிபதி டொனால்ட் ட்ரம்ப் செப்டம்பர் மாதம் அறிவித்த திட்டத்தின் இரண்டாம் கட்டம் தொடங்கியுள்ளதாக அமெரிக்கா இந்த வாரம் அறிவித்தது.

அதில் அந்தப் பகுதியில் ஒரு இடைக்கால தொழில்நுட்ப வல்லுநர் தலைமையிலான பாலஸ்தீனிய நிர்வாகத்தை உருவாக்கும் திட்டமும் அடங்கும்.

ஜனாதிபதி ட்ரம்ப் தலைமையில் இயங்கவிருக்கும் மற்றும் காஸாவின் தற்காலிக நிர்வாகத்தைக் கண்காணிக்கும் பொறுப்பைக் கொண்ட, அமைதிக் குழு என்று அழைக்கப்படும் அமைப்பின் முதல் உறுப்பினர்களின் பெயர்களும் அறிவிக்கப்பட்டன.

 இந்தக் குழுவில் ரூபியோ, கோடீஸ்வரான ஸ்டீவ் விட்காஃப் மற்றும் ட்ரம்பின் மருமகன் ஜாரெட் குஷ்னர் ஆகியோர் உறுப்பினர்களாக உள்ளனர் என்பது குறிப்பிடத்தக்கது.