பேட்டரி மாற்றும் வசதியுடன் Bziness XS மின்சார ஸ்கூட்டர் இந்தியாவில் அறிமுகம்

இந்தியாவில் பேட்டரி மாற்றும் வசதியுடன் Bziness XS மின்சார ஸ்கூட்டர் அறிமுகமாகியுள்ளது.

Indofast Energy நிறுவனம், Indian Oil மற்றும் SUN Mobility இணைந்து, Quantum Energy-யுடன் கூட்டாண்மை செய்து புதிய Bziness XS மின்சார ஸ்கூட்டரை அறிமுகப்படுத்தியுள்ளது.

பேட்டரி மாற்றும் (Battery Swapping) வசதியுடன் வந்துள்ள இந்த வாகனம், ரூ.57,750 (எக்ஸ்-ஷோரூம்) விலையில் வெளியிடப்பட்டுள்ளது.

இந்த ஸ்கூட்டர், தினசரி பயணிகள், டெலிவரி பணியாளர்களை குறிவைத்து வடிவமைக்கப்பட்டுள்ளது.

வாடிக்கையாளர்கள் பேட்டரியை நேரடியாக வாங்க வேண்டிய அவசியமில்லை. மாதம் ரூ.999 முதல் தொடங்கும் எரிசக்தி திட்டங்கள் அல்லது ரூ.1,499 முதல் EMI திட்டங்களை தேர்வு செய்யலாம்.

பேட்டரி சார்ஜ் செய்ய காத்திருக்க வேண்டிய அவசியமின்றி, இரண்டு நிமிடங்களில் பேட்டரி மாற்றம் செய்யும் வசதி வழங்கப்பட்டுள்ளது.

இந்தோஃபாஸ்ட் நிறுவனம் தற்போது 22 நகரங்களில் 1,100-க்கும் மேற்பட்ட பேட்டரி மாற்ற நிலையங்களை இயக்கி வருகிறது. இதுவரை 43 மில்லியன் பேட்டரி மாற்றங்கள் செய்யப்பட்டு, 1.17 பில்லியன் கிலோமீட்டர் பயணம் மேற்கொள்ளப்பட்டுள்ளது.

FY 2025-26-ல் 1,000 யூனிட்கள் வெளியிடப்பட்டு, அடுத்த மூன்று ஆண்டுகளில் 10,000 வாகனங்களை சந்தையில் கொண்டு வர திட்டமிடப்பட்டுள்ளது.

இந்த Bziness XS மாடல், இந்திய சாலைகளுக்கேற்ப வடிவமைக்கப்பட்ட மற்றும் மலிவான என்ட்ரி-லெவல் மின்சார ஸ்கூட்டர் ஆகும்.