« மாற்றம் நெருங்குகிறது » : 2026-ஐ வெற்றியாண்டாக மாற்ற RN இலக்கு!!

2026 ஆம் ஆண்டை ராசம்பிள்மோ நசியோனல் (RN) கட்சிக்கான « வெற்றியை நோக்கிய ஆண்டு » ஆக மாற்ற வேண்டும் என மெரின் லூ பென் மற்றும் ஜோர்டன் பார்தெல்லா அறிவித்துள்ளனர். 

புத்தாண்டை முன்னிட்டு வெளியிட்ட வாழ்த்து வீடியோக்களில், 2027 ஆம் ஆண்டு நடைபெறவுள்ள ஜனாதிபதி தேர்தலில் « பெரிய அரசியல் மாற்றம் » ஏற்படும் என அவர்கள் நம்பிக்கை தெரிவித்தனர். 2025 ஆம் ஆண்டு எதிர்பார்த்த மாற்றங்களை கொண்டு வரவில்லை என்றும், தற்போதைய அரசியல் அமைப்பு சோர்வடைந்துள்ளதாகவும் அவர்கள் விமர்சித்துள்ளனர்.

இதற்கிடையில், கட்சி நீதித்துறையில் கடினமான ஆண்டை சந்தித்தது; மெரின் லூ பென் மீது விதிக்கப்பட்ட தண்டனைகள் காரணமாக 2027 தேர்தலில் அவர் பங்கேற்பது மேல் முறையீட்டு தீர்ப்பை பொறுத்தது. இந்நிலையில், வரும் மார்ச் மாத நகராட்சி தேர்தல்களில் வாக்காளர்கள் திரளாக பங்கேற்க வேண்டும் என இருவரும் அழைப்பு விடுத்துள்ளனர். இந்த தேர்தல், கட்சியின் கருத்துகளை பிராந்தியங்களில் வேரூன்றச் செய்து, 2027 தேர்தலை வலிமையுடனும் நம்பகத்தன்மையுடனும் எதிர்கொள்ள உதவும் என அவர்கள் தெரிவித்துள்ளனர்.

மேலும் « மாற்றம் நெருங்கிவிட்டது; அதனால் எதையும் விட்டுவிடக்கூடாது » என்று மெரின் லூ பென் வலியுறுத்தியுள்ளார். « எங்களை எதிர்த்து எந்த வகையான தாக்குதல்களோ அல்லது தவறான முறைகளோ பயன்படுத்தப்பட்டாலும், நாங்கள் தளர மாட்டோம் » என்றும் அவர் தெரிவித்துள்ளார்.